Улсын онцгой комисс өнгөрсөн даваа гарагт /2016.01.04/ өвөлжилтийн нөхцөл байдлын талаар мэдээлэл хийлээ. Энэ үеэр өвөлжилтийн нөхцөл байдалтай танилцаж, орон нутагт гамшгийн эрсдэлийн үнэлгээ хийсэн Шуурхай бүлгийн ажлын тайланг Улсын онцгой комиссоос танилцууллаа.

Шуурхай бүлэг өнгөрсөн сарын 16-28-ны өдрүүдэд орон нутагт ажилласан бөгөөд энэ үеэр 16 аймгийн 50 сум цагаан зудтай, 20 аймгийн 120 сум зудархуу байгаа гэдгийг мэдээллээ. Тиймээс Засгийн газрын 2015 оны 12 дугаар сарын 14-ний өдрийн “Өвөлжилтийн нөхцөл байдалтай холбогдуулан авах арга хэмжээний тухай” 48 дугаар тогтоолоор улсын нөөцөөс үнэгүй болон үнэ хямдаруулан өвс, тэжээл олгохоор болсон юм. Тодруулбал, Улсын онцгой комисс, Засгийн газрын шийдвэрээр 2011, 2012, 2013 онуудын нөөцөөс үлдсэн 6560 тонн өвсийг малчдад үнэ төлбөргүй олгохоор боллоо. Мөн 2678 тонн тэжээлийг 50 хувийн хөнгөлөлттэй үнээр нийлүүлнэ.