Ахмад дайчин 100 настайгаа золголоо

2021-05-17

1945 оны Чөлөөлөх дайнд оролцсон ахмад дайчин, чөлөөнд байгаа дэд хурандаа Т.Бат-Очир гуай өнөөдөр 100 насныхаа их ойтой золголоо.

Ахмад дайчин Төмөрийн Бат-Очир 1921 оны 5 дугаар сарын 15-ны өдөр одоогийн Говь-Алтай аймгийн Эрдэнэ сумын нутагт төржээ.

Тэрээр 1950-1951 онд Цэргийн Ерөнхий сургуулийн Офицерын 6 сарын давтан курс, 1964-1966 онд ЗХУ-д Цэргийн холбооны академийн дээд курс, 1957-1960 онд тухайн үеийн Марксизм, Ленинизмийн оройн дээд сургуульд суралцаж төгссөн.

Т.Бат-Очир 1940 онд Нийслэл хотноо Цэргийн холбооны засварын төвд алба хааж эхэлсэн мөчөөс Ардын Армийн ариун жагсаалд 46 жилийн хөдөлмөр, зүтгэлээ зориулсан манлайлагч, хөдөлмөрч, дайчин зан чанартай ахмад холбоочин билээ.

Тэр 1945 оны Чөлөөлөх дайны хүнд нөхцөлд цэргийн холбооны техник хэрэгслийн найдвартай ажиллагааг хангахын зэрэгцээ цахилгааны гэрэлтүүлэг тавих, машины болон радио станцуудын хураагууруудыг цэнэглэх, шингэнийг сэлбэх, засварлах ажлыг амжилт дүүрэн гүйцэтгэснийг түүх мартах учиргүй.

Тэрхүү Чөлөөлөх дайны дараагаар олон арван офицер, ахлагч нар энх цагийн бүтээн байгуулалтад шилжсэн нөхцөлд ахлах дэслэгч Т.Бат-Очир Батлан хамгаалах яамны Шуудан тасгийн дарга, техникчээр томилогдон үүргээ үлгэр жишээ гүйцэтгэхийн хамт залуу үеэ цэргийн холбооны мэргэжилд сургах, төлөвшүүлэх үйлсэд жинтэй хувь нэмэр оруулсан юм.

Улмаар 1956 оноос Цэрэг ба Нийгмийг аюулаас хамгаалах яамны Холбооны засварын бүлгийн даргаар, 1967 оноос Ардын Армийн 013 дугаар ангийн захирагчийн орлогчоор, 1981-1986 онд Ардын Армийн 104 дүгээр ангид Засварын дарга, техникчээр бахархал дүүрэн ажилласныг нь бид хүндлэн бахархах нь зүйн хэрэг юм.

Энэ хугацаанд өөрийн унаган авьяас, мэргэжлийн ур чадвар, техникийн сэтгэлгээгээ ямагт хөгжүүлж улс, армийн хэмжээнд 10 гаруй шинэ бүтээл, оновчтой саналыг санаачлан хэрэгжүүлж, бүртгэлийн гэрчилгээг авсан нь өнөөгийн бидэнд нэн сургамжтай санагдана.

Т.Бат-Очир гуай сүүлийн жилүүдэд шүлэг, яруу найргийг ихэд сонирхон "Есөн манжлагат цагаан туг", "Цэргийн дайчин туг", "Цэргийн тангараг", "Жанжин тугийн намираа", "Цэргийн холбоо", "Ахмад холбоочид" зэрэг олон дууны шүлгийг бичиж, Цэргийн дуу бүжгийн эрдмийн чуулгын урын санд оруулсан авьяаслаг уран бүтээлч билээ. Түүний энэхүү авьяас, зүтгэлийг нь өндрөөр үнэлэн "Соёлын тэргүүний ажилтан" цолыг хүртээсэн бид ихэд бэлгэшээдэг билээ.

Эрхэм ахмад дайчны маань энгэрт тодоос тод гялалзах Сүхбаатарын одон, Байлдааны гавьяаны улаан тугийн одон, Байлдааны гавьяаны одон, "Алтан гадас" одон, Байлдааны медаль, Ардын хувьсгалын 40, 50, 60, 70, 80, 90 жилийн ойн медаль, Монгол, Зөвлөлтийн "Бид ялав" медаль, ЗХУ-ын Байлдааны медаль, Жуковын медаль, Халхын голын байлдааны ялалтын 30, 40, 50 жилийн ойн медаль, БХЯ-ны Хүндэт тэмдэг, "БХЯ-ны Тэргүүний ажилтан" цол, тэмдэг, "Онц холбоочин" цол зэрэг нь чөлөөнд байгаа дэд хурандаа Т.Бат-Очирын гавьяат үйлсийг бүрнээ илтгэж буйг Та анзаарах биз ээ.

Дайнд оролцсон ахмад дайчин, Ардын Армийн "Анхны" тодотголтой "Онц холбоочин", чөлөөнд байгаа дэд хурандаа Төмөрийн Бат-Очир Танд 100 насны түүхт ойг тань тохиолдуулан баярын мэндчилгээг өргөн дэвшүүлж, эрүүл энх,

аз жаргал, сайн сайхан бүхнийг бэлгэдэн ерөөе.

Эрхэм Таны бие эрүүл, ухаан саруул байж, урт удаан наслан залуу хойч үеийнхнийг эх оронч үзлээр хүмүүжүүлэх үйлсэд жинтэй хувь нэмрээ оруулсаар байх болно гэдэгт итгэл төгс байна.

Монгол төрийн буян заяа, Монгол цэргийн сүр хүч, Бүх цэргийн цэргийн Их хар сүлдний сүлд хийморь Таныг үеийн үед ивээх болтугай!

 

Хурандаа Б.ОТГОНБАЯР

Сэтгэгдэл үлдээх



Энэ мэдээ танд таалагдаж байвал LIKE хийгээрэй. Танд баярлалаа.

Соргог онцлох

Ерөнхийлөгчид нэр дэвшигчид ӨНӨӨДӨР мэтгэлцэнэ
Н.Түвшинбаяр МҮОХ-нд тамгаа авчирч өгчээ
М.Уранцэцэг Хөдөлмөрийн баатар цолоо ДАШТ-ий 4 дэх медалиар мялаалаа
Монголд байнга оршин суух зөвшөөрөлтэй гадаадын иргэд гарах-орох виз мэдүүлэх шаардлагагүй боллоо
Н.Түвшинбаяр МҮОХ-ны ТАМГЫГ буцааж өгнө гэжээ
Өнөөдөр 1189 хүнээс халдвар илэрч, 13 хүн нас барлаа
Ахлах ахлагч Э.Даваажамц 90 км зам туулаад байна
Худал мэдээлэл түгээсэн гэх Г.Ган-Очирыг баривчилжээ
Өнөөдөр 10260 иргэнийг дархлаажуулна
Д.СУМЪЯАБАЗАР: Улсын төсвөөс жил бүр 420 тэрбум төгрөгийг нийслэлд олгохоор болсон
Хатуу хөл хорио тогтоохгүй
Нийслэлийн 18-аас дээш насны иргэд 100 хувь I тундаа хамрагджээ
С.Батцэцэг, О.Насанбурмаа нар Польшийн нийслэл Варшавт барилдана
Урсгал уснаас эрэн хайх, аврах ажиллагааны дадлага сургууль эхэллээ
Өнөөдөр ихэнх нутгаар цаг агаар тогтуун байна
Монгол ноолуур анх удаа газраар Итали улс руу тээвэрлэгдлээ
Н.Түвшинбаярт холбогдох хэргийг шалгаж дуусчээ
Зорилтот бүлгийн иргэдэд Файзер вакцин хийж байна
Тусгаарлан ажиглах байранд 6308 иргэн байна
2021 онд агаарын бохирдлоос гадна хөрс, ус, хогны асуудлыг чухалчилна