Баянзүрх дүүргийн 11-р хороонд нэг айлын гурван хүүхэд угаартаж, 12 настай эмэгтэй хүүхэд монгол гэрт сайжруулсан шахмал түлшинд угаартсан байдалтай, биедээ ил харагдах гэмтэл, шархгүй нас баржээ. Уг хэрэг өчигдөр буюу 12 дугаар сарын 26-ны өдрийн 15 цаг 31 минутад Баянзүрх дүүргийн 11-р хорооны нутаг дэвсгэрт гарчээ. Бид энэ талаар хүүхдүүдийн ээж н.Эрдэнэчимэгтэй утсаар  холбогдож тодрууллаа.

Тэрбээр "Өчигдөр өглөө 08.00 цагийн орчимд галаа түлчихээд нүүрс авах гээд 13.00 цагийн орчимд гэрээсээ гараад эргээд 14.00 цаг өнгөрөөгөөд нүүрсээ аваад ирсэн. Намайг гэртээ орж ирэхэд хоёр охин маань газарт ухаангүй, хоёр настай хүү орон дээрээ мөн ухаангүй хэвтэж байсан. Тэгээд л Түргэн тусламж дуудсан. Манайх сайжруулсан шахмал түлшийг 9 дүгээр сараас хойш түлээд болоод л байсан.  Ер нь нөхөр бид хоёр л галаа түлдэг. Охидууд маань түлж чаддаггүй. Урьдын адил л өчигдөр галаа түлээд л гарсан ийм харамсалтай зүйл болно гэж бодсонгүй.  Би ухаангүй байсан хоёр хүүхдээ аваад шууд  ЭХЭМҮТ-д  ирсэн.  Шүүх шинжилгээ рүү талийгаачийг авч явсан гэж нөхөр маань хэлсэн. Ямар шалтгаанаар охин амиа алдсан нь одоогоор тодорхойгүй л байна. Шалгаж байгаа л гэж хэлсэн. Бидний хувьд сайжруулсан шахмал түлшнээс болж амиа алдсан гэж бодож байна" гэлээ. 

эх сурвалж MASS.MN