Улсын нэгдүгээр төв эмнэлгийн дэргэдэх Элэг шилжүүлэн суулгах үндэсний багийнхан энэ долоо хоногт гурван хүнд мэс засал хийхээр төлөвлөжээ.

Тус багийнхан Монголд элэг шилжүүлэн суулгах мэс заслыг 61 дэх хүнд хийсэн бол өнөөдөр болон, нөгөөдөр  дараагийн хоёр хагалгааг хийх юм байна. Энэ удаагийн мэс засалд 30-45 насны гурван хүн орох гэнэ.

Элэг шилжүүлэн суулгах үндэсний багийнхан бие даан 31 хүнд энэ мэс засал хийсэн байдаг. Тэдгээр хүмүүсийн бие сайн байгаа талаар доктор, профессор О.Сэргэлэн хэлэв.

Уг мэс заслын өртөг нь 80 орчим сая төгрөг бөгөөд үүний 65 саяыг Улсын төсвөөс, 10 орчим сая төгрөгийг Эрүүл мэндийн даатгалын сангаас хариуцдаг. Харин өвчтөн 10 сая орчим төгрөгийг хувиасаа гаргадаг болжээ.

Энэ оны Улсын төсөвт 24 хүнд элэг шилжүүлэн суулгах мэс заслын төлбөрийг тусгасан бол ирэх оны төсөвт мөн ийм тооны хүний эмчилгээний зардлыг төсөвлөсөн байна.