НИТХ-ын ээлжит 29 дүгээр хуралдаан болж нийслэлийн 2020 оны төсвийг баталсан.

Улмаар нийслэлд авто зам ашигласны татварыг тав дахин нэмэгдүүлэх санал ч мөн батлагдсан билээ. Тэгвэл энэхүү шийдвэрийг эсэргүүцэн "Машинтай жагсаал"-г зохион байгуулах болсон. Жагсаалыг санаачлагчид энэ сарын 9-15-ны хооронд буюу долоо хоногийн хугацаанд 07:00-18:00 цагийн хооронд эсэргүүцлийн жагсаал зохион байгуулах аж.

Жагсаалаар мөн нийгмийн даатгалын шимтгэлийг 26 хувь болтол өсгөсөн явдал, зээлийн хүүгийн дарамт, мөнгө хүүлэлтийг эсэргүүцэх юм байна. "Машинтай жагсаал"-ыг улс төрийн намууд болон иргэний хөдөлгөөнүүд дэмжихээ илэрхийлж байгаа гэх мэдээллийг зохион байгуулагчдын зүгээс өгч байгаа бөгөөд тэд Сүхбаатарын талбай, Төрийн ордныг машинтайгаар тойрч, эсэргүүцэл илэрхийлэхээр төлөвлөжээ. 

"Машинтай жагсаал"-ын зохицуулагч Б.Цэгмэд “Нийт иргэддээ хандаж хэлэхэд, бидний гаргасан татвар, хураамж бууруулах санаачилгыг дэмжихийг уриалж байна. Мөн түргэн тусламж, гал, цагдаагийнханд анхааруулж хэлэхэд ирэх долоо хоногт Төв зам бөглөрөх нь тодорхой боллоо. Энд 1000-аас доошгүй машин цуглана. Тиймээс дээрх байгууллагууд Төв замын ачааллыг тооцож, бусад замыг сонгохыг хүсэж байна” хэмээлээ.

Одоогоор "Машинтай жагсаал"-ыг Монгол ардын хувьсгалт нам, Үнэн ба зөв нам, хөгжлийн хөтөлбөр нам, Ард түмний олонхын засаглал нам, Эх орончдын нэгдсэн нам, Монголын хүний төлөө нам, Монголын либерал нам, Монголын ногоон нам, Үндэсний фронт хөдөлгөөн, Улсаа аврах ард түмний хөдөлгөөн зэрэг нам, хөдөлгөөнүүд дэмжихээ илэрхийлээд байгаа.

эх сурвалж mass.mn